InSight er leiðangur úr Discovery geimáætlun NASA og gengur út á að lenda jarðeðlisfræðikanna á Mars í september 2016 til að rannsaka innviði reikistjörnunnar.

InSight á að mæla jarðskjálfta og ein örugg leið til þess er að mæla skjálfta eftir árekstra loftsteina og smástirna við Mars. InSight getur numið merki um stóra árekstra langt frá kannanum og smærri en nálægari árekstra.

Á þessari nýlegu ljósmynd frá HiRISE, sem tekin var til að skoða lendingarstað leiðangursins, sést áberandi gígur með mjög skörpum börmum og efnisslettu sem er dekkri og blárri en næstum öll rykhula svæðisins. Áreksturinn hlýtur því að hafa orðið mjög nýlega þar sem ekki hefur gefist nægur tími fyrir ryk úr lofthjúpnum að þekja og lýsa svæðið á ný.

Eldri myndir benda enda til að gígurinn hafi myndast einhvern tímann milli 2008 og 2012. Myndin sýnir hvað myndavélar á braut um Mars munu leita að á meðan leiðangri InSight stendur í tilraun til að finna skjálftaupptökin.

Þýðing: Sævar Helgi Bragason