Á norðurpól Mars er bunga með íslögum sem eru allt að 2 kílómetra þykk, nokkurn veginn hliðstæð íshettum Grænlands og Suðurskautslandsins á Jörðinni.

Þótt það sjáist ekki á þessari mynd einkennist bungan af skornum spírallaga lægðum sem eru lagskiptar en lögin eru talin endurspegla þær breytilegar loftslagsaðstæður sem uppi voru þegar þau mynduðust. Myndin sýnir svæði á pólbungunni, milli lægðanna — við sjáum stór, venjulega samfelld og flata sléttu með þunnu lagi úr mjög hreinum vatnsís. Myndin sýnir líka mjög grófa áferð í laginu, hóla hryggi og lægðir sem eru frá 1 upp í 10 metrar að stærð.

Rannsóknir á þessari áferð eru rétt nýhafnar með hárri upplausn HiRISE — smáatriði í áferðinni eru breytileg um pólhettuna en ekki er vitað hvers vegna svo er. Á myndinni sjást tvenns konar einkenni sem eru mjög áhugaverð. Annars vegar er lægð í suðvestri þar sem áferð jökulsins virðist breytast. Hins vegar er sprunga eða röð af dældum í suðaustri, sem er sjaldgæft fyrirbæri.

Mikilvægt er að skilja birtu, samsetningu, áferð og litlar myndanir í þessu íslagi sem þekur mestan hluta pólbungunnar, þar sem þessir þættir hafa áhrif á staðbundið orkujafnvægi (eins og magn sólarljóss sem endurvarpast og gleypist), sem aftur hefur áhrif á heimskautaloftslagið og stöðugleika íssins.

Þýðing: Sævar Helgi Bragason