Þótt HiRISE hafi tekið nokkrar glæsilegar myndir af sandstrókum og ryksveipum, er myndasafnið á heildina litið fremur takmarkað. Myndir frá bæði Mars Orbiter Camera og HiRISE hafa sýnt að á þessu svæði eru sandstrókar og ryksveipir fremur algengir (svo stundum nást nokkrir á mynd), svo með því að taka myndir á réttum árstíma eigum við góða möguleika á að fá enn betri upplýsingar um þessi fyrirbæri.

Þessi myndataka tókst með ágætum — á henni sést einn stór og áberandi sandstrókur í norðri og tveir minni og ekki eins áberandi strókar í miðjunni. Sandstrókarnir þekkjast á myndunum út frá þokukenndum formum sínum og skuggunum sem þeir varpa á yfirborðið, en út frá skuggunum er hægt að reikna út hæð þeirra.

Sandstrókar á Mars myndast á sama hátt og í eyðimörkum á Jörðinni: Sólin hitar upp yfirborðið svo heitara og léttara loft stígur upp á við í stólpum; vindur hreyfir stólpana til eftir yfirborðinu og lyftir um leið upp og ögnum eins og ryki af yfirborðinu og hrífur þau með sér.

Athuganir hafa leitt í ljós að hægt er að áætla færslu strókanna yfir yfirborðið og hringrás vindsins í þeim út frá litmyndum HiRISE, ef við erum svo heppin að þeir náist á litaræmum HiRISE (niður miðja mynd).

Þýðing: Sævar Helgi Bragason