Hinn 20. mars 2014 tóku menn fyrst eftir um 8 km breiðum dökkum bletti á yfirborði Mars á myndum í lágri upplausn frá Mars Color Imager Camera (eða MARCI) á Mars Reconnaissance Orbiter. MARCI sér svo til alla reikistjörnuna á hverjum degi, svo vísindamenn gátu notað gögn frá henni til að finna út hvenær bletturinn birtist fyrst: Hann sást ekki á myndum sem teknar voru 27. mars 2012 en birtist daginn eftir.

Til að fylgja þessu eftir tók Context Camera myndir af svæðinu í hærri upplausn snemma í apríl. Myndir fyrir og eftir sýna tvo nýja og stóra árekstragíga á staðnum. Myndir Context Camera hafa upplausn upp á 6 metrar á pixel, svo hægt er að greina vel hvar miðja blettanna er en venjulega koma gígarnir sjálfir ekki fram, vegna þess að flestir nýir gígar eru örfáir metrar á breidd.

Þar kemur upplausn HiRISE til skjalanna: myndavélar okkar sýndu enn fínni smáatriði á svæðinu. Í ljós kom að stærri nýi gígurinn virtist örlítið ósamhverfur og mældist 49 sinnum 44 metrar að þvermáli. Hann er því stærsti nýi gígurinn sem MRO hefur fundið á Mars hingað til. Á myndum bæði HiRISE og Context Camera sést einnig fjöldi nýrra, lítilla skriðufalla á svæðinu.

Allar þessa samstilltu athuganir sýna vel hvernig mismunandi hópar vísindamanna með sama geimfar geta unnið saman og gert ítarlegar rannsóknir á áhugaverðum fyrirbærum.

Þýðing: Sævar Helgi Bragason