Sandöldurnar í Russell gígnum eru með eftirlætis viðfangsefnum HiRISE, því myndirnar eru ekki aðeins óhemju fallegar, heldur gera þær okkur kleift að mæla ákomu hríms á haustin, ár eftir ár, og fylgjast með því hverfa á vorin.

Hrímið er vitaskuld koldíoxíðís sem oft og tíðum þurrgufar (fer beint úr föstu formi í gas) að vori á Mars. HiRISE ljósmyndar sömu svæði á Mars ítrekað til að rannsaka árstíðabreytingar eins og þessa. Á stöðum eins og í Russell gígnum — ævafornum 140 kílómetra breiðum árekstragíg — getum við fylgst náið með breytum í landslaginu með því að bera saman myndir teknar á mismunandi tímum. Það hjálpar okkur að öðlast betri skilning á virkum ferlum á Rauðu plánetunni.

Þýðing: Sævar Helgi Bragason