Þunnir, beinir og bugðóttir hryggir finnast víðsvegar á Mars. Slíkir hryggir geta myndast með ýmsum hætti.

Ár sem renna undir jöklum bera með sér berg og sand sem getur myndað upphleyptan hrygg, það sem kallast malarás, þegar jöklarnir hörfa. Stundum límist sandur í árfarvegum saman svo síðar meir, þegar áin er horfin, veðrast lausari jarðvegur í kringum farveginn fremur, þannig að gamli árfarvegurinn stendur eftir.

Á myndinni ganga tiltölulega beinir og mjóir hryggir á víxl í hlíðunum milli fjallanna og dalanna í kring. Sú staðreynd að hryggirnir liggi meðfram bröttu hlíðunum, segir okkur að ólíklegt sé að þeir hafi myndast í vatni á sama hátt og greint er frá hér að ofan. Að auki virðast sumir hryggirnir liggja í gegnum fjöllin og á hlíðarnar hinumegin. Þetta bendir til þess að hryggirnir skeri sig djúpt inn í fjöllin.

Hryggur í storkubergi, sem kallast berggangur, verður til þegar kvika þrýstist inn í berg og upp í átt að yfirborðinu. Kvikan kólnar og storknar svo úr verður mjög hart berg sem stenst veðrun betur en bergið í kring, sem kvikan þrýsti sér í gegnum. Þegar þetta mjúka berg veðrast, situr harðara bergið eftir sem hryggur og leiðir í ljós æðakerfi eldfjallsins.

Þýðing: Sævar Helgi Bragason