Á þessari mynd sést sandöldusvæði á Nili Fossae svæðinu á Mars. Dökku línurnar sem liggja þvers og kruss um sandöldurnar eru slóðir eftir sandstróka.

Sandstrókar eða sveipir eru hvirfilvindar sem þyrla upp ljósleitu rykinu á yfirborðinu þegar þeir færast yfir það. Línurnar sem sjá má á sandöldunum má rekja til dökkleitari sands sem situr eftir þegar þunna ryklagið hefur fokið burt.

Þetta svæði var seinast ljósmyndað í ágúst árið 2009, fyrir næstum tveimur Mars-árum, en á þeirri mynd eru slóðir eftir sandstróka líka sjáanlegar. Aftur á móti eru slóðirnar sem nú sjást gerólíkar hinum fyrri. Þetta segir okkur að í millitíðinni hafi orðið að minnsta kosti einn sandstormur sem hafi afmáð gömlu slóðirnar en fjöldi sandstróka myndað nýjar slóðir í kjölfarið.

Við sjáum einnig dökkar rákir stefna niður hlíðar sandaldanna. Þessar rákir má rekja til einhvers konar flæðis niður ölduna sem fjarlægir ysta og ljósa rykið. Árið 2009 sáust samskonar rákir á hlíðum aldanna en þær voru ólíkar þeim sem við sjáum nú. Þar af leiðandi er ljóst að flæðið sem orsakaði þessar rákir enn virkt í dag.

Þýðing: Sævar Helgi Bragason