Hér sést svæði suðaustur af hinni risavöxnu Hellas árekstrardæld sem hefur sérstaka eiginleika á hitamyndum THEMIS.

Að degi til er hitastig yfirborðsins fremur kalt á meðan næturhitastigið er nokkuð hlýtt. Þetta segir okkur að yfirborðsefnið leiðir hita vel, líkt og steinar frekar en fínna efni.

Á þessari mynd sjást fjölmargir hnullungar og sumstaðar mynda þeir gróf hringamynstur. Ástæðan fyrir þessu gæti mögulega verið vegna margra lítilla árekstrargíga (sem ekki sjást lengur nema hugsanlega vegna mynstursins). Önnur tilgáta er sú að virk ferli á Mars geti smám saman flutt til stóra hnullunga (allt að nokkrir metrar að þvermáli) með tímanum.

Á þessari breiddargráðu (58. breiddrargráðu suður) er næstum örugglega ís undir jarðveginum sem þenst út og dregst saman samhliða hitabreytingum. Hitastigsspennan og tilfærsla fíns efnis með vindi, gæti fært hnullungana til. Önnur hugmynd er sú að fyrir skömmu hafi ísinn hugsanlega bráðnað og frosið aftur; ferli sem leiðir til myndunar steinhringa eða melatigla á jörðinni.

Þýðing: Sævar Helgi Bragason